गणित केवल अंक, सूत्र र समीकरणको विषय मात्र होइन, आधुनिक विज्ञान, प्रविधि, अर्थतन्त्र र सामाजिक विकासको आधारस्तम्भ पनि हो। यही सन्देशलाई केन्द्रमा राख्दै काभ्रेपलाञ्चोकको धुलिखेलमा चौथो अन्तर्राष्ट्रिय ‘एप्लिकेसन अफ म्याथम्याटिक्स टु ननसाइन्सेज’ सम्मेलन आयोजना गरिएको छ।
एसोसिएसन अफ नेपालीज म्याथम्याटिसियन्स इन अमेरिका, नेपाल गणित समाज तथा त्रिभुवन विश्वविद्यालयको गणित केन्द्रीय विभागको संयुक्त आयोजनामा सम्पन्न सम्मेलनले गणितको सैद्धान्तिक अध्ययनलाई व्यवहारिक जीवनसँग जोड्ने प्रयास गरेको छ। सम्मेलनमा नेपालसहित विभिन्न देशका गणितज्ञ, अनुसन्धानकर्ता, नीति निर्माता, प्राध्यापक तथा विद्यार्थीहरूको उल्लेखनीय सहभागिता रहेको छ।
सम्मेलनका संयोजक तथा त्रिभुवन विश्वविद्यालयका प्राध्यापक डा. परमेश्वरी कट्टेलका अनुसार गणित शिक्षा, प्राकृतिक तथा सामाजिक विज्ञान, इन्जिनियरिङ, स्वास्थ्य, वित्तीय क्षेत्र र तथ्याङ्कशास्त्रमा गणितको प्रयोगबारे नवीन अनुसन्धान तथा अनुभव आदानप्रदान गर्ने उद्देश्यले सम्मेलन आयोजना गरिएको हो। उहाँका अनुसार गणित आज प्रयोगशाला र कक्षाकोठाभन्दा धेरै टाढा पुगिसकेको छ। कृत्रिम बुद्धिमत्ता, डाटा विश्लेषण, स्वास्थ्य अनुसन्धानदेखि आर्थिक योजना निर्माणसम्म गणितको भूमिका दिनप्रतिदिन विस्तार भइरहेको छ।
सम्मेलनले विशेषगरी युवा अनुसन्धानकर्ता र विद्यार्थीलाई अनुसन्धान संस्कृतितर्फ आकर्षित गर्ने अपेक्षा गरिएको छ। राष्ट्रिय तथा अन्तर्राष्ट्रिय स्तरका वैज्ञानिकबीच सहकार्य विस्तार गरी गणित शिक्षाको गुणस्तर सुधार्न तथा नयाँ अनुसन्धानको वातावरण निर्माण गर्न सम्मेलन महत्वपूर्ण हुने आयोजकहरूको विश्वास छ।
सम्मेलनका अर्का संयोजक तथा एम्ब्री–रिडल एरोनोटिकल विश्वविद्यालयका प्राध्यापक डा. हरिहर खनालले नेपालमा यसअघि तीन पटक यस्तै प्रकृतिका सम्मेलन सम्पन्न भइसकेको जानकारी दिँदै यस संस्करणले अझ व्यापक अन्तर्राष्ट्रिय सहभागिता जुटाएको बताउनुभयो। उहाँका अनुसार सम्मेलनमा प्रस्तुत उत्कृष्ट दुई अनुसन्धानपत्रलाई विशेष प्रकाशनको अवसर प्रदान गरिनेछ, जसले नेपाली अनुसन्धानलाई अन्तर्राष्ट्रिय जगतमा स्थापित गर्न मद्दत पुग्ने अपेक्षा गरिएको छ।
नेपाल गणित समाजका कोषाध्यक्ष तथा काठमाडौँ विश्वविद्यालयका सहप्राध्यापक डा. सरस्वती आचार्यका अनुसार सम्मेलनमा करिब २२० जना अनुसन्धानकर्ता, प्राध्यापक, नीति निर्माता तथा विद्यार्थी सहभागी छन्। यसले नेपालको शैक्षिक तथा अनुसन्धान क्षेत्रको अन्तर्राष्ट्रिय पहुँच विस्तार गर्न सहयोग पुग्ने विश्वास गरिएको छ।
गणित समाज काठमाडौँ विश्वविद्यालय, नेपाल तथ्याङ्कशास्त्र समाज तथा काउन्सिल फर म्याथम्याटिक्स एजुकेसन सहआयोजक रहेको सम्मेलनले शैक्षिक उद्देश्यसँगै नेपालको पर्यटन प्रवर्धनमा समेत योगदान पुर्याउने अपेक्षा गरिएको छ। प्राकृतिक सौन्दर्य, शैक्षिक वातावरण र अन्तर्राष्ट्रिय सम्मेलन आयोजना गर्न सक्ने क्षमताका कारण धुलिखेलले पुनः एकपटक विश्वका गणितविद्हरूको ध्यान आकर्षित गरेको छ।
ज्ञान, अनुसन्धान र सहकार्यको यो संगमले गणितलाई केवल पाठ्यपुस्तकको विषय नभई समाज रूपान्तरणको शक्तिशाली माध्यमका रूपमा स्थापित गर्ने प्रयास गरेको छ। धुलिखेलमा जुटेका स्वदेशी तथा विदेशी विज्ञहरूको यो साझा मञ्चले भविष्यका अनुसन्धान, नवीन सोच र अन्तर्राष्ट्रिय साझेदारीका नयाँ ढोका खोल्ने अपेक्षा गरिएको छ।
तपाईको प्रतिक्रिया