डाडाँपारिबासीलाई सधै डर, बिरामी पर्दा स्टेचरकै भर

बिरामीपर्दा सिधै एम्बुलेन्सबाट बनेपा र काठमाडौंसम्म आउने काभ्रेपलाञ्चोक जिल्लाको महाभारत गाउँपालिका र खानीखोला गाउँपालिकाका स्थानीय पुनः स्टेचरमै बिरामी बोक्न बाँँध्य बनेका छन् । गाउँपालिकामा सुविधा सम्पन्न एम्बुलेन्स पनि छन् तर पहिरोले दर्जनौ ठाउँमा अवरोध भएपछि त्यहाँका नागरिक पुनः स्टेचरमै बोकाएर अस्पतालसम्म ल्याउने बाँध्यता सुरु भएको छ ।
डाडाँपारिबासीले एम्बुलेन्स सेवा पाउन लागेको दुई बर्षमात्रै भयो, त्यसअघि सिधा सडक सम्पर्क नभएको गाउँपालिकाले संघीयता कार्यान्वयपछि आफूलाई विकटभित्रको विकट गाउँबाट क्रमशः सुगम गाउँमा रूपान्तरण गर्दैथिए । गाउँपालिकाले एम्बुलेन्स सेवामा सहुलियत दिएका थिए ।
२०८१ साल असोज १० देखि १२ गतेसम्म भएको अविरल बर्षापछि डाडाँपारिका दुई गाउँपालिकाको ‘लाईफलाईन’ को रुपमा रहेको रोशी खोलामा बनेको पक्की पुल बगाएपछि डाडाँपारिबासी फेरि स्टेचरमा फर्किएका हुन् । पक्की पुल बगाएपछि बनाएको अस्थायी कल्भटपनि असोज १८ गते भएको अविरल बर्षापछि आएको बाढीले बगाएपछि सडक, बिजुली सेवाबाट दुई वटा पालिका बन्चित भएका हुन् । अविरल बर्षापछि दुई पालिकालाई जोड्ने सडक अबरुद्ध भएका छन् । रोशी गाउँपालिकाका धेरै वडासम्म जाने सडक संञ्जाल टुटेको छ । पालिकासँग स्काभेटर र डोजर भएपनि प्रर्याप्त डिजेल नहुँदा समस्या झेलिरहेका छन् । एक बर्षमा पटक–पटक संघीय सरकार र प्रदेश सरकारबाट बेलीब्रिजको आश्वासन पाएपनि कार्यान्वयन भने हुन सकेको छैन ।
रोशी गाउँपालिका वडा नं ७ र नमोबुद्ध नगरपालिका वडा नं ५ को सिमाना थाङसेनवेशीमा रहेको पक्की पुल बगाएपछि डाडाँपारिबासीको दुःखका दिन फेरि सुरुभएको महाभारत गाउँपालिकाका अध्यक्ष कान्छालाल जिम्बाले उल्लेख गर्नुभयो । महाभारत गाउँपालिकामा भएका १२ वटा स्वास्थ्यचौकीमा प्रारम्भिक उपचार भएपनि गम्भिर प्रकृतिको उपचारका लागि स्टेचरमा बोकेर ल्याउने गरेको उहाँले बताउनुभयो ।
सरकारले सुत्केरी हुन नसकेकाको लागि हेलिकोप्टरको व्यवस्थापन गरेपनि सबैलाई त्यसो गर्न सम्भव नभएपछि स्टेचरको विकल्प नभएको बताउनुभयो । ‘एक जना बिरामी ल्याउन दश जनासम्मको जनशक्ती आवश्यक पर्ने र दुई दिनको बाटो बोकेर ल्याउने बाँध्यता छ’ जिम्बाले भन्नुभयो ।
महाभारत गाउँपालिका,खानीखोला गाउँपालिका र रोशी गाउँपालिकाबाट स्टेचरबाट नै दैनिक दश जनासम्म बिरामी बोकेर ल्याउने गरेको मनसुनजन्य विपद् उद्धार अस्थायी वेश भकुण्डेवेशीका प्रमुख आलोक बस्नेतले उल्लेख गर्नुभयो । निक्कै सिकिस्त बिरामी ल्याउने गरेको र बिरामी ल्याउन आवश्यक सहयोग र सहजीकरण सुरक्षा निकायले पनि गरिरहेको उहाँले उल्लेख गर्नुभयो ।
उहाँले पुल नहुँदा आफ्नो पालिकाबाट दुई दिन लगाएर बोकेर चौकीडाडाँसम्म ल्याउने बाँध्यता रहेको उल्लेख गर्नुभयो । जोखिमपुर्ण ठाउँमा सशस्त्र प्रहरी बल, नेपाल प्रहरी र नेपाली सेनाले पनि सहयोग गरेर एम्बुलेन्स चल्ने ठाउँसम्म ल्याईदिएको बताउनुभयो ।
बत्तीमुनिको अँध्यारो भने जस्तै संघीय राजधानीबाट १३० किलोमिटर र प्रदेश राजधानीबाट ५० किलोमिटरको दुरीमा रहेको डाँडापारि क्षेत्रका जनताले समस्या व्यहोरेको खानीखोला गाउँपालिकाका अध्यक्ष ईन्द्रबहादुर थिङले उल्लेख गर्नुभयो ।
उहाँले अविरल बर्षापछि आफ्नो गाउँपालिकाको प्रमुख सडक पुर्ण रुपमा अवरुद्ध भएको त्यसको मारमा गम्भिर प्रकृतिका बिरामी परेको बताउनुभयो । उहाँले स्टेचरमै बोकेर ल्याउने बाँध्यता भएको सुनाउनुभयो । ‘गाउँपालिकासँग अत्याधुनिक एम्बुलेन्स छन् तर एम्बुलेन्स चलाउने बाटो नभएपछि स्टेचरमै बोक्ने बाँध्यता छ’ उहाँले थप्नुभयो,‘ हामी युद्धस्तरमा सडक खुलाउने कार्यमा जुटेका छौ, आशा गरौं एक दुईदिनमा सडक खुल्छ ।’