पनौती । सानो हातमा विद्यालयको झोला, अनुहारभरि उत्साह र आँखामा भविष्यका अनगिन्ती सपना। कसैले नयाँ साथी खोज्दै थियो, कसैले पहिलो पटक ठूलो विद्यालयको परिसर नियाल्दै। पनौती–४ स्थित काभ्रे इङ्लिश माध्यमिक विद्यालयमा बिहीबार र शुक्रबार यस्तै खुसी, कौतुहल र आत्मीयताले भरिएको दृश्य देखिन्थ्यो।
शैक्षिक सत्र २०८३ मा नयाँ भर्ना भएका १८७ जना विद्यार्थीलाई विद्यालयले विशेष कार्यक्रममार्फत स्वागत गर्दा विद्यालय परिसर बालबालिकाको हाँसो, गीत–सङ्गीत र रंगीन प्रस्तुतिले गुञ्जिएको थियो। प्लेग्रुपदेखि कक्षा ९ सम्म नयाँ आएका विद्यार्थीहरूलाई विद्यालय परिवारले फूल, ताली र आत्मीय शब्दमार्फत स्वागत गरेको थियो।
प्लेग्रुपमा भर्ना भएकी एक नानी आमा–बुबाको हात समातेर मञ्चअगाडि उभिएकी थिइन्। केही समयपछि उनी अरू साथीहरूसँगै गीतमा रमाउँदै नाच्न थालिन्। त्यो दृश्यले अभिभावकको अनुहारमा मुस्कान ल्याएको थियो। “पहिलो दिन रोला कि भन्ने डर थियो, तर यति रमाइलो वातावरण देख्दा ढुक्क भयौँ,” एक अभिभावकले सुनाइन्।
विद्यालयले दुई दिनमा आयोजना गरेको कार्यक्रममा जेठ १४ गते प्लेग्रुपदेखि कक्षा १ सम्मका १४१ जना तथा जेठ १५ गते कक्षा २ देखि ९ सम्मका ४६ जना विद्यार्थीलाई स्वागत गरेको हो। कार्यक्रम केवल औपचारिक स्वागतमा सीमित रहेन, बरु नयाँ विद्यार्थीलाई विद्यालयसँग भावनात्मक रूपमा जोड्ने प्रयास बनेको थियो।
कार्यक्रममा विद्यार्थीहरूले नृत्य, गीत–सङ्गीत, प्रहसन, ब्याण्ड प्रस्तुति लगायत सिर्जनात्मक कला प्रस्तुत गरेका थिए। साना बालबालिकादेखि ठूला कक्षाका विद्यार्थीले आत्मविश्वासका साथ मञ्च सम्हाल्दा अभिभावकले लामो समयसम्म ताली बजाइरहेका देखिन्थे।
काभ्रे शिक्षा विकास प्रतिष्ठानका अध्यक्ष जगन्नाथ अवालले शिक्षा केवल परीक्षा पास गर्ने माध्यम नभई व्यक्तित्व निर्माणको आधार भएको बताउनुभयो। उहाँले “हरेक बालबालिकाभित्र असीम सम्भावना हुन्छ, त्यसलाई चिन्ने र उजागर गर्ने जिम्मेवारी विद्यालयको हो,” भन्दै विद्यार्थीलाई सकारात्मक सोच र अनुशासनसहित अघि बढ्न प्रेरित गर्नुभयो।
विद्यालयका प्रिन्सिपल वसन्तराज नेपालका अनुसार नयाँ विद्यार्थीलाई विद्यालयप्रति अपनत्व महसुस गराउने उद्देश्यले कार्यक्रम आयोजना गरिएको हो। “विद्यालयको पहिलो अनुभव नै बालबालिकाको मनमा बस्ने भएकाले हामीले सिकाइसँगै आत्मीय वातावरण दिन खोजेका हौँ,” उहाँले भन्नुभयो।
दुई दिनसम्म विद्यालय परिसरमा देखिएको खुसी र उत्साहले नयाँ शैक्षिक यात्राको संकेत गरिरहेको थियो। नयाँ पोसाकमा सजिएका बालबालिकाका चम्किला आँखा र अभिभावकको आशावादी अनुहारले विद्यालय परिसरलाई केवल शिक्षालय होइन, सपना निर्माण गर्ने साझा थलो बनाइदिएको थियो
तपाईको प्रतिक्रिया