विद्यालय र कलेज केवल पाठ्यपुस्तकको ज्ञान दिने संस्था मात्र होइनन्, जीवनका नयाँ अध्याय सुरु गर्ने र पुराना यात्रालाई सम्मानपूर्वक बिदाइ गर्ने थलो पनि हुन्। यही भावनालाई आत्मसात गर्दै काभ्रेको बनेपास्थित ज्ञानकुञ्ज शैक्षिक प्रतिष्ठानले कक्षा १२ को अध्ययन पूरा गरेका विद्यार्थीलाई विदाई तथा कक्षा ११ मा नयाँ भर्ना भएका विद्यार्थीलाई स्वागत गर्ने कार्यक्रम सम्पन्न गरेको छ।
‘शिक्षा विद्यार्थीका लागि, विद्यार्थी देशका लागि’ भन्ने मूल नाराका साथ आयोजित कार्यक्रममा उत्साह, भावुकता र नयाँ आशाको सुन्दर संगम देखिएको थियो। अध्ययनको एउटा चरण पूरा गरेर नयाँ यात्रामा निस्कन लागेका विद्यार्थी र शैक्षिक जीवनको नयाँ अध्याय सुरु गर्न आएका विद्यार्थीबीच अनुभव, प्रेरणा र शुभेच्छाको आदानप्रदान भएको थियो।
प्रतिष्ठानका प्रबन्ध निर्देशक प्रताप वैद्यको सभापतित्वमा सम्पन्न कार्यक्रममा सहायक प्रिन्सिपल नमराज दाहालले स्वागत मन्तव्य व्यक्त गर्दै ज्ञानकुञ्जले केवल शैक्षिक उपलब्धिमा मात्र नभई विद्यार्थीको व्यक्तित्व विकास, नेतृत्व क्षमता तथा नैतिक मूल्य निर्माणमा समेत विशेष ध्यान दिँदै आएको बताए।
कार्यक्रममा व्यवस्थापन समिति सदस्यहरू प्रताप वैद्य र आत्माराम थापाले विद्यार्थीलाई टीका, खादा, मेडल, ब्याच तथा प्रमाणपत्र प्रदान गर्दै सम्मान गरेका थिए। सम्मान ग्रहण गर्दै विद्यार्थीहरूले ज्ञानकुञ्जमा बिताएका वर्षहरू आफ्नो जीवनका अविस्मरणीय क्षण बनेको बताएका थिए।
‘सफलता मात्र होइन, जिम्मेवारी पनि सम्झनुहोस्’
कार्यक्रमलाई सम्बोधन गर्दै प्रबन्ध निर्देशक वैद्यले कक्षा १२ उत्तीर्ण विद्यार्थीलाई उज्ज्वल भविष्यको शुभकामना व्यक्त गर्दै जीवनको आगामी यात्रामा ज्ञान, अनुशासन र सामाजिक उत्तरदायित्वलाई सँगै लिएर अघि बढ्न आग्रह गरे।
उनले शिक्षा केवल व्यक्तिगत सफलताका लागि नभई समाज र राष्ट्र निर्माणको आधार भएकाले विद्यार्थीले जिम्मेवार नागरिकका रूपमा आफूलाई स्थापित गर्नुपर्ने धारणा राखे।
वैद्यले ज्ञानकुञ्जले गुणस्तरीय, आधुनिक तथा वैज्ञानिक शिक्षण प्रणालीमार्फत अभिभावक र विद्यार्थीको विश्वास जित्न सफल भएको उल्लेख गर्दै आगामी दिनमा पनि उत्कृष्ट शैक्षिक सेवा प्रदान गर्न संस्था प्रतिबद्ध रहेको बताए।
शतप्रतिशत नतिजाका ‘नायक’ सम्मानित
कार्यक्रमको अर्को आकर्षण राष्ट्रिय परीक्षा बोर्डद्वारा सञ्चालित २०८२ सालको कक्षा १२ को परीक्षामा शतप्रतिशत नतिजा हासिल गराउन योगदान पुर्याएका शिक्षकहरूको सम्मान थियो। प्रतिष्ठानले उत्कृष्ट नतिजाका पछाडि शिक्षकहरूको मेहनत, समर्पण र निरन्तर मार्गदर्शन रहेको उल्लेख गर्दै सम्मान गरेको हो।
सहायक कलेज प्रमुखले विद्यार्थीलाई अध्ययनसँगै सामाजिक, सांस्कृतिक तथा खेलकुद गतिविधिमा सक्रिय सहभागिता जनाउन आग्रह गर्दै ज्ञानकुञ्जबाट प्राप्त ज्ञान, सीप र अनुभवलाई जीवनोपयोगी बनाउन सुझाव दिए।
संस्कृति, सिर्जना र सम्झनाका क्षण
औपचारिक कार्यक्रमपछि विद्यार्थीहरूले विभिन्न सांस्कृतिक नृत्य, गीत तथा मनोरञ्जनात्मक प्रस्तुति दिएका थिए। प्रस्तुति हेर्दै शिक्षक, अभिभावक र विद्यार्थी भावुक तथा उत्साहित देखिन्थे।
विदाई लिने विद्यार्थीका लागि यो कार्यक्रम सम्झनाको एउटा सुन्दर अध्याय बनेको थियो भने नयाँ विद्यार्थीका लागि आत्मविश्वास र प्रेरणाले भरिएको स्वागत समारोह बनेको थियो।
कार्यक्रममा सहभागी अभिभावक, शिक्षक तथा समुदायका प्रतिनिधिले यस्ता कार्यक्रमले विद्यार्थीको शैक्षिक उपलब्धिसँगै सामाजिक, सांस्कृतिक तथा भावनात्मक विकासमा महत्वपूर्ण योगदान पुर्याउने धारणा व्यक्त गरेका थिए।
ज्ञानकुञ्ज शैक्षिक प्रतिष्ठानले शिक्षालाई केवल परीक्षा र नतिजामा सीमित नराखी विद्यार्थीको समग्र व्यक्तित्व विकाससँग जोड्ने प्रयास गर्दै आएको छ। स्वागत र विदाई कार्यक्रमले पनि त्यही शैक्षिक दर्शनलाई पुनः एकपटक उजागर गरेको सहभागीहरूको भनाइ थियो।
तपाईको प्रतिक्रिया